கல்வி "கதாநாயகன்' : இன்று காமராஜரின் 109 வது பிறந்தநாள்

தமிழகத்தில் ஆரம்பத்தில் ஆதிதிராவிடர்களுக்கு தான் இலவச கல்வி சலுகை அளிக்கப்பட்டது. இச்சலுகையை பின், பிற்படுத்தப்பட்ட வகுப்பினருக்கும், ஆதிதிராவிடர்களாக இருந்து மதம் மாறியவர்களுக்கும் அளித்து 1957-58ம் ஆண்டில் காமராஜர் அரசு உத்தரவிட்டது. இதனால் பலரும் பலன் பெற்றனர். ஆண்டு வருமானம், ஆயிரத்து 200 ரூபாய்க்கு கீழ் இருந்தால் உயர்கல்வி வரை இலவச கல்வி என 1960ம் ஆண்டில் காமராஜர் தலைமையிலான தமிழக அரசு உத்தரவிட்டது. அதுவே, அனைவருக்கும் உயர்நிலைப் பள்ளி வரை இலவச கல்வி என 1962ல் மாற்றப்பட்டது. இதே ஆண்டு 6-11 வயது வரை உள்ள அனைவருக்கும் கட்டாயக்கல்வியாக அறிமுகப்படுத்தப்பட்டது. காமராஜர் ஆட்சிப் பொறுப்பேற்ற 1954ம் ஆண்டில் 6 முதல் 11 வயது குழந்தைகளில், 45 சதவீதம் பேர் வரை மட்டுமே பள்ளிக்கு சென்றனர். ஆனால் 1963ல் அதே வயது பிரிவை சேர்ந்த 80 சதவீதம் குழந்தைகள், பள்ளிக்கு சென்றனர். அதாவது, 1954ல் 18 லட்சம் சிறுவர் மட்டுமே பள்ளிக்கு சென்றனர் என்ற நிலை மாறி 1963 பள்ளிக்கு சென்ற சிறுவர்களின் எண்ணிக்கை 47 லட்சமாக உயர்ந்தது.
இடைநிலை கல்வியை பொறுத்தவரை 1954ல் ஆயிரத்து 6 பள்ளிகளில் 4 லட்சத்து 89 ஆயிரம் மாணவர்கள் பயின்றனர். இது காமராஜரின் ஆட்சியில், இரண்டு மடங்காகியது. 1954ல் இருந்த 141 ஆசிரியர் பயிற்சி பள்ளிகள், காமராஜரின் 9 ஆண்டுகால ஆட்சியில் 209 ஆக உயர்ந்தது. கல்வித்துறையில் காமராஜர் செய்த புரட்சி, தமிழக மக்களிடையே கல்வி கற்பதில் விழிப்புணர்வை ஏற்படுத்தியது. தமிழகத்தில் "ஆரம்ப பள்ளிகள் இல்லாத கிராமமே இல்லை' என்ற நிலை, காமராஜர் காலத்தில் உருவானது. தேவையான அளவு வசதிகளுடன் கூடிய உயர்நிலைப்பள்ளிகள், தமிழகத்தில் ஐந்து கி.மீ., தூரத்துக்கு ஒன்றாக அமைந்தன. ஒரு சமுதாயம், வெற்றிகரமான சமுதாயமாக திகழ விழிப்புணர்வும் அவசியம். இதை உணர்ந்த காமராஜர் அரசு, கல்விக்கு அளித்த முன்னுரிமையை நூலக இயக்கத்துக்கும் அளித்தது. தங்கள் ஊர்களில் நூலகம் அமைத்து செயல்பட, நூலகத்துக்கு இடம், கட்டடம், நூல்கள், பொருட்கள் ஆகியவற்றை தருவதற்கு பொதுமக்கள் உற்சாகப்படுத்தப்பட்டனர். இதன் காரணமாக, நூலகங்கள் இல்லாமல் இருந்த தமிழ்நாட்டில் 638 பொது நூலகங்களும், 12 மாவட்ட மைய நூலகங்களும் திறக்கப்பட்டன.

கல்லாமையை இல்லாமை ஆக்கிய காமராஜர் : முன்னாள் முதல்வர் காமராஜருடன் பழகும் வாய்ப்பு பெற்றவர்கள் விருதுநகர் புட்டு தெருவை சேர்ந்த சகோதாரர்கள் என்.கணேசன், என்.ஜெயராமன்.

ஓய்வு பெற்ற கல்லூரி பேராசிரியரான என். ஜெயராமன்(77) பழைய சம்பவங்களை நினைவு கூர்ந்து கூறியதாவது: காமராஜர், தான் அணிந்த கதராடை போல் தூய மனதுடையவர். ஏழ்மை காரணமாக 6 ம் வகுப்பு வரை மட்டுமே படித்த அவருக்கு , கல்வி தாகம் கொண்ட ஏழை சிறுவர்களுக்கு இலவச கல்வி வழங்க வேண்டும் என்ற ஆசை இருந்தது. முதல்வரானதும், ஏழை மாணவர்கள் கற்க வேண்டும் எண்ணத்தை செயல்படுத்த முனைந்தார். கிராமம் தோறும் கல்விக்கூடங்களை அமைத்தார். பசிக்கும் வயிற்றோடு சிறுவர்கள் பாடங்களில் கவனம் செலுத்த முடியாது என்பதால், மதிய உணவு திட்டத்தை அமல்படுத்தி, பள்ளிகளுக்கு மாணவர்களை வர செய்தார். இதற்காக கல்வித்துறையின் அப்போதைய இயக்குனர் நெ.து. சுந்தரவடிவேலுவிடம் தனது எண்ணத்தை கூறியபோது, இயக்குனரோ, ""அதிகம் செலவாகுமே,'' என்றார். ""பணத்தை பற்றி கவலைப்பட வேண்டாம்; வசதியுள்ளவர்களிடம் பிச்சை எடுத்தாவது திட்டத்தை அமல்படுத்த வேண்டும்,'' என்றார் காமராஜர் . கல்வி அமைச்சராக இருந்த சி.சுப்பிரமணியனும் இத்திட்டத்திற்கு ஊக்கமளித்தார். தமிழகத்தில் கல்லாமையை இல்லாமை ஆக்கியவர் காமராஜர். சுய நலம் இல்லாதவர். அவர் முதல்வராக இருந்தபோது, தாயார் சிவகாமி, தண்ணீர் பற்றாக்குறையால், நகராட்சி அதிகாரிகளிடம் குடிநீர் வசதி செய்து தர கேட்டார். முதல்வரின் தாயார் என்பதால் அதிகாரிகளும் அவரது வீட்டுக்குள்ளே குடி நீர் குழாய் அமைத்தனர். இதை அறிந்த காமராஜர், தன் வீட்டுக்கு குழாய் போட்ட அதிகாரி யார் என அறிந்து, அவரிடமே, ""24 மணி நேரத்திற்குள் வீட்டில் உள்ள குழாயை அகற்ற வேண்டும்,'' என, உத்தரவிட்டார். குழாய் அகற்றப்பட்டது .
பஞ்சு வியாபாரி என். கணேசன் (79) கூறியதாவது: காமராஜர் முதல்வரானவுடன் மக்களை சந்திக்க தேனிக்கு சென்றார். எம்.எல்.ஏ., என்.ஆர். தியாகராஜன், முதல்வர் காமராஜரிடம், ""ஆண்டிபட்டி மலைக்கணவாய் பகுதி வழியாக வரும் சரக்குகளை சிலர் அபகரித்து செல்கின்றனர். அதை தடுக்க ஒரு வழி செய்ய வேண்டும்,'' என்றார்.

யோசனையில் ஆழ்ந்த காமராஜர், ""கலெக்டர் ஐயாவை கூப்பிடுங்கள்,'' என்றார். கலெக்டர் வந்தவுடன் இந்த பகுதியில் ஓடும் முல்லை பெரியாறு, வைகையை இணைத்து ஒரு அணை கட்ட வேண்டும். அதற்கான சர்வே எடுத்து அனுப்புங்கள்,'' என உத்தரவிட்டார்.
தியாகராஜன் எம்.எல்.ஏ.,வோ, நாம் திருட்டு பற்றி கூறுகிறோம், சம்பந்தமில்லாமல் அணை கட்ட சொல்கிறாரே என நினைத்து காமராஜரிடமே கேட்டுவிட்டார். அவரோ, ""பொருட்களை ஏன் அபகரிக்கின்றனர். அவர்களுக்கு வேலையும் இல்லை, கையில் பணமும் இல்லை. இதற்கு அணை கட்டினால் விவசாயம் வளரும், பொருள்களை அபகரிப்பது குறையும்,'' என்றார். கலெக்டரும் அணை கட்ட நிலம் சர்வே செய்து அறிக்கை அனுப்பினார். அணை கட்டினால் குன்னூர் என்ற கிராமம் நீரில் மூழ்கி பாதிக்கும் என்பதால், குன்னூர் கிராம மக்களை அழைத்து பேசி, அங்குள்ள குடும்பங்களுக்கு மேட்டு பகுதியில் நிலம் ஒதுக்கவும், நஷ்ட ஈடு வழங்கவும், அதை உடன் செயல்படுத்தவும் உத்தரவிட்டார். அவரால் உருவாக்கப்பட்ட வைகை அணையால், இன்று லட்ணக்கான ஏக்கருக்கு பாசன வசதியும், குடிநீரும் கிடைக்கிறது.
காமராஜர் டில்லி செல்லும் போதெல்லாம் தொழிற்சாலைக்கான அனுமதியுடன் தான் வருவார். அந்த வகையில் வந்ததுதான் ஆவடி டேங்க் தொழிற்சாலை, பெரம்பூர் ரயில்வே கோச் பேக்டரி, நெய்வேலி நிலக்கரி சுரங்கம், திருச்சி பெல் நிறுவனம் என பட்டியலிடலாம், என்றார்.

காமராஜ் இருந்தால் "காம்ராஜ்' : நியாயமான விஷயங்களுக்கு மட்டுமே கோபம் கொள்ளும் காமராஜர், மேடைகளில் மக்களுக்கு புரியும் படியான பேச்சு வழக்கில் தான் பேசுவார். பேசும் போது சுதந்திரத்திற்கு காரணமான மகாத்மா காந்தியடிகள் பற்றி குறிப்பிடுவதை வழக்கமாக கொண்டிருந்தார். அதிகாரிகளை அழைக்கும் போது "ஐயா 'என மரியாதையாக அழைக்கும் பழக்கம் கொண்டவர். பிரதமர் நேரு சென்னை வந்த போது அவரை , விமான நிலையத்தில் பத்திரிகையாளர்கள் சந்தித்து தமிழக அரசியல் பற்றி கருத்து கேட்டனர். அப்போது நேரு,""காமராஜ் இருக்கும் இடம் காம்ராஜ்(அமைதி அரசு) ஆக இருக்கும்,'' என, குறிப்பிட்டார்

மலிவு பிரசாரம் வேண்டுமா?

நான், சென்னை பச்சையப்பன் கல்லூரியில், 1953-66 ஆண்டில், இளங்கலை அறிவியல் படித்துக் கொண்டிருந்தபோது, ஒரு முறை, கல்லூரி தேர்வுக் கட்டணமான, 300 ரூபாயை என் பெற்றோரால் செலுத்த முடியவில்லை. அப்போது தமிழக முதல்வராக இருந்த காமராஜரிடம், இதைத் தெரிவித்தேன். உடனடியாக தனது உதவியாளர் வைரவன் மூலமாக, 300 ரூபாயை என்னிடம் தந்து, "உடனடியாக கல்லூரிக்கு சென்று பணத்தைக் கட்டு' என்றார்; நான் திகைத்து நின்றேன்.
"நீங்கள் உதவி செய்ததை பத்திரிகைகளுக்குத் தெரிவிக்கலாமா? முதல்வர், கல்லூரி மாணவனுக்கு உதவி' என்று செய்தி போடுவர்' என்று கேட்டேன். உடனே அவருக்கு கோபம் வந்துவிட்டது. "இந்த 300 ரூபாயை உனக்குத் தந்ததை பேப்பரில் போட்டு மலிவு பிரசாரம் தேடிக்கொள்ள வேண்டுமா? போ... போய் ஒழுங்காகப் படித்து, உன் குடும்பத்தை காப்பாற்று' என்று அனுப்பினார் காமராஜர்.அவரது உதவியால் நானும் கல்லூரிப் படிப்பை முடித்து, அரசுப் பணியில் சேர்ந்து, உயர்ந்தேன். என்னைப் போல் அவரால் உதவி பெற்றவர்கள் பலர் உள்ளனர். அந்தச் செய்திகள் எல்லாம், எங்கும் பதிவாகவில்லை.- மணி.சுதந்திரக்குமார், ஓய்வு பெற்ற அரசு அலுவலர்,சூளை, சென்னை.

காமராஜரின் போராட்டங்களும்அனுபவித்த தண்டனைகளும்

விருதுநகர் மாவட்டத்தில், 1903ம் ஆண்டு பிறந்த காமராஜர் குடும்ப சூழ்நிலை காரணமாக தனது பள்ளிப் படிப்பை ஆறாம் வகுப்பிலேயே நிறுத்திக்கொண்டார். துணிக்கடை ஒன்றில் வேலை பார்த்துக்கொண்டிருந்த அவர், முதல் உலகப் போரின்போது, பெரும் தலைவர்களின் பேச்சைக் கேட்டு முதன் முதலாக அரசியலில் ஈடுபட்டார். ஏராளமான மக்கள் போராட்டங்களில் ஈடுபட்ட காமராஜர், அதற்காக பல முறை சிறை தண்டனைகளையும் அனுபவித்துள்ளார்.
அவர் மேற்கொண்ட போராட்டங்களும், சிறை தண்டனைகளும்:
1920ல் ஒத்துழையாமை இயக்க போராட்டம்
1923ல் மதுரையில் கள்ளுக்கடை போராட்டம்
1930ல் உப்பு சத்தியாகிரகம் (இரண்டாண்டு சிறை)
1932ல் சட்ட மறுப்பு இயக்கம் (ஓராண்டு சிறை)
1942ல் வெள்ளையனே வெளியேறு இயக்கம் (ஓராண்டு சிறை)
இவை மட்டுமின்றி, சுசீந்திரம் போராட்டம், வைக்கத்தில் தீண்டாமை ஒழிப்பு உள்ளிட்ட ஏராளமான மக்கள் போராட்டங்களிலும் காமராஜர் முக்கிய பங்கு வகித்தார்.

"நகரமைப்புக்காக வெளிநாட்டு பயணம் தேவையில்லை

மதுரையை விட சிறந்த நகரமைப்பு எங்கிருக்கிறது?
தமிழக மக்கள், ஆந்திராவில் உள்ள திருப்பதிக்கும், கேரளாவில் உள்ள அய்யப்பனுக்கும் அதிக முக்கியத்துவம் தந்து வழிபட்டு வருவது, காமராஜருக்கு உறுத்தலாக இருந்தது. இந்த காரணத்தால், தமிழக அரசிற்கு வரும் வருமானம் பாதிக்கப்பட்டது தான் அதற்கு காரணம். திருப்பதி ஏழுமலையான் கோவில் உண்டியல் வருமானத்தை விட, பழனி முருகன் கோவில் வருமானம் பல மடங்கு குறைவாகவே, அப்போதும் இருந்து வந்தது.
ஓர் ஆன்மிகக் கூட்டத்தில் பங்கேற்க வாய்ப்பு கிடைத்த போது, காமராஜர் தனது உள்ளக்கிடக்கையை இப்படி வெளிப்படுத்தினார்:தமிழக பக்தர்கள் மிக அதிகளவில் திருப்பதி ஏழுமலையான் கோவிலுக்கு காணிக்கை செலுத்துகின்றனர். நம்ம ஊரில் உள்ள ஸ்ரீரங்கம், திருப்பதிக்கு எந்த வகையிலும் குறைந்தது கிடையாதுன்னேன். உங்கள் காணிக்கையை ஸ்ரீரங்கம் உண்டியலில் போட்டால், அது தமிழகத்துக்கு பயன் தரும்.மக்களுக்கு பல நல்ல காரியங்களைச் செய்ய முடியும். அதனால், நம்ம சாமியும், பெரியசாமி தான் என்று உணர்ந்து கொள்ள வேண்டும்.இவ்வாறு சொன்ன காமராஜரின் பேச்சில் உள்ள நியாயம், தமிழகத்திற்கு நன்மை செய்ய வேண்டும் என்ற ஆர்வத்தை புரிந்து கொண்ட ஆன்மிகவாதிகள், அதைப் பெரிதும் வரவேற்றனர்.அவரது அக்கறையை வெளிப்படுத்தும் இன்னொரு சம்பவமும் உண்டு.
காமராஜர் முதல்வராக இருந்த போது, சென்னையின் புறநகர்ப் பகுதிகளில், மேல்நாடுகளைப் போல் குட்டி நகரங்களை (சாட்டிலைட் சிட்டி) அமைக்க, நகர அபிவிருத்திக் கழக அதிகாரிகள் முடிவு செய்தனர். இதற்காக ஒரு குழுவினர் வெளிநாடு சென்று, அங்குள்ள நகரமைப்பு முறைகளை பார்த்து வரலாம் என முடிவானது. இதற்கு துறை அமைச் சரும் ஒப்புதல் கொடுத்துவிட்டார்.
அடுத்ததாய், முதல்வர் காமராஜர் ஒப்புதல் கொடுத்தால், விமானப் பயணம் போக அதிகாரிகள் தயாராய் இருந்தனர். இந்த நிலையில், ஒப்புதலுக்காக முதல்வர் காமராஜரிடம், கோப்பு சென்றது. அதைப் படித்துப் பார்த்தார் காமராஜர். "மக்கள் கொடுத்த வரிப் பணத்தில் இந்த உலகச் சுற்றுலா தேவை தானா' என்று அவருக்குள் கேள்வி எழுந்தது.இந்த சிந்தனையின் போது, அவரது மனதில் மதுரை நகரத்தின் வடிவமைப்பு தோன்றியது. மதுரையின் மையப் பகுதியில் மீனாட்சியம்மன் கோவில்; சுற்றிலும் தேரோடும் ரத வீதிகள்; அடுத்த சுற்றில் அளவெடுத்து வைத்தார் போல், நான்கு மாட வீதிகள்; அதற்கடுத்து வீதிகள்; இடையில் இவைகளை இணைக்கும் சாலைகள்.
"அந்தக் காலத்திலேயே, எவ்வளவு தொலைநோக்கோடு நம் முன்னோர் நகரை வடிவமைத்திருக்கின்றனர். இந்த அமைப்புக்கு மேல், நகரமைப்பு திட்டமிட என்ன இருக்கிறது' என்று நினைத்த காமராஜர், அதையே, கோப்பில் குறிப்பாக எழுதினார்."நகரமைப்புக்காக வெளிநாட்டு பயணம் தேவையில்லை. எக்காலத்திற்கும் ஏற்றார்போல் அமைக்கப்பட்டிருக்கும், நம் மதுரை நகருக்குச் சென்று, ஆய்வு செய்து வாருங்கள்' என்று குறிப்பெழுதி, வெளிநாட்டு பயணத்துக்கு தடைபோட்டு, மக்கள் வரிப்பணத்தை காத்தார் காமராஜர்.

"டாக்டர்' காமராஜர்

வேறு எந்த மாநிலமும் செய்யாத கல்விப் புரட்சியை தமிழகத்தில் முதல்வராக இருந்த காமராஜர் செய்ததால், நாடு முழுவதும் அவரது புகழ் பரவியிருந்தது. குஜராத் பல்கலைக்கழக பேரவை கூடி, கல்விப் புரட்சி செய்த காமராஜருக்கு டாக்டர் பட்டம் தர முடிவு செய்தது.இதை தெரிவிப்பதற்காக, பல்கலைக்கழகத்தின் பிரதிநிதிகள் காமராஜரை சந்தித்தனர். அவர்களிடம் காமராஜர் பேசும் போது, "டாக்டர் பட்டமா... எனக்கா... நான் என்ன பெரிய சாதனை செஞ்சுட்டேன்னு இந்த முடிவை எடுத்தீங்க... எனக்கு டாக்டர் பட்டமெல்லாம் வேண்டாம். நாட்டில் எத்தனையோ மேதாவிகள், விஞ்ஞானிகள் இருக்காங்க... அவங்களை தேடிப்பிடிச்சு, இந்தப் பட்டத்தை கொடுங்க. எனக்கு டாக்டர் பட்டம் கொடுப்பதை, நான் ஒத்துக்க மாட்டேன்' என்று சொல்லி திருப்பி அனுப்பி விட்டார்.ஹூம்... அது அந்த காலம்!

தினமலர் பதிவு செய்த நாள் : மார்ச் 28,

"கிங் மேக்கர்' காமராஜர் (1954 - 63)

பிறப்பு: 1905 ஜூலை 15
இறப்பு: அக்., 2, 1975
1976ல் பாரத ரத்னா விருதுஇயற்பெயர் காமாட்சி. செல்லப்பெயர் ராஜாசுதந்திர போராட்ட காலத்தில், 3,000 நாட்கள் சிறை வாசம்திருமண வாழ்வை விரும்பாதவர்.பிரகாசம், ராமசாமி ரெட்டியார், குமாரசாமி ராஜா, ராஜாஜி போன்றோர் முதல்வராக காரணமாக இருந்தார்நேருவுக்கு பின் சாஸ்திரி, அவருக்குப் பின் இந்திரா பிரதமராக வருவதில் முக்கிய பங்காற்றினார். இதனாலேயே, "கிங் மேக்கர்' என போற்றப்பட்டார்.

கல்விக்கு முக்கியத்துவம்"கே' (காமராஜர்) பிளான்: மூத்த தலைவர்கள் பதவியில் இருந்தால் தான் செயலாற்ற முடியும் என்பது தவறு; அந்த எண்ணம் கூடாது. அமைச்சர்கள், பதவியைத் துறக்க வேண்டும். கட்சிப் பணியாற்ற வேண்டும். பதவியைத் துறப்பது என்றால் பொறுப்பை தட்டிக்கழிப்பது என்பது பொருளல்ல என்றவர் காமராஜர்றி1967ல் தி.மு.க.,விடம் தோற்றது குறித்து காமராஜர் கூறுகையில், "எதிர்ப்பு அலை பயங்கர வேகத்துடன் அடித்துள்ளது. அந்த வேகத்தில் கொள்கைக்கும், மனிதர்களுக்கும் இடையே உள்ள தராதரத்தை புரிந்துகொள்ளாமல் மக்கள் வாய்ப்பளித்துள்ளனர்' என்றார்.காமராஜர் கூறுகையில், "தோத்துட்டோம்; நல்லாவே தோத்துட்டோம். ரஷ்ய மை மோசடி என வாய்க்கு வந்தபடி சொல்ல வேண்டாம்னேன்' என்றார் பெருந்தன்மையாக.

முதல்வர் காரை நிறுத்திய போலீஸ்காரர்!

"ஐயா! இது முதல்வர் செல்லும்போது, போக்குவரத்தை உஷார்படுத்த எழுப்பப்படும் ஒலி. முன்னாள் முதல்வர்கள் பிரகாசம் ஐயா, ராஜாஜி ஐயா எல்லாருடைய காலத்திலும் இருந்துவரும் சம்பிரதாயம்' என்றார் காவல்துறை அதிகாரி.

"இதுக்கு முன்னாலே இந்த சம்பிரதாயங்கள் எல்லாம் இருந்திருக்கலாம். எனக்கு இதெல்லாம் வேண்டாம்... சத்தம் போடாம, முன்னால போங்க' எனக் கூறிவிட்டு, அமைதியாய் தன் பயணத்தைத் துவக்கினார் காமராஜர். கார், கோடம்பாக்கம் - நுங்கம்பாக்கம் சாலை சந்திப்பை அடையும்போது, போக்குவரத்தை சரிசெய்துகொண்டிருந்த காவலர், காமராஜர் காரை நிறுத்தினார்.

காமராஜரின் காருக்கு முன்னால் நின்றிருந்த காவல் துறை அதிகாரியின் முகத்தில் எள்ளும் கொள்ளும் வெடித்தது. அதைப் பற்றி கவலைப்படாமல், போக்குவரத்து சீரானதும், காமராஜரின் காரை புறப்பட அனுமதித்தார் அந்த காவலர்.

தன்னைத் தாண்டி கார் செல்லும்போது தான், காரில் செல்பவர் காமராஜர் என்பது அந்த காவலருக்கு புரிந்தது. "முதல்வர் காரையே நிறுத்திவிட்டோமே. இனி என்னவாகுமோ' என நடுநடுங்கிப் போனார். அன்று மாலை காமராஜர் வீடு திரும்பும்போது, அவரது வீட்டின் முன், நடுங்கியபடியே காத்திருந்தார் அந்த காவலர்.

"முதல்வர் கார் என தெரியாமல் நிறுத்திவிட்டேன். என்னை மன்னித்துவிடுங்கள்' என்று காவலர் கதற, "உங்க கடமையைத்தானே செய்தீங்க...' என்று அவரது தோளில் ஆதரவாய் தட்டி பாராட்டினார் காமராஜர். அதுமுதல், காமராஜரின் பயணத்தின்போது, பாதுகாப்புக்கு செல்லும் போலீஸ் வாகனங்கள், "சைரன்' ஒலி எழுப்பியதே இல்லை. தன்னை மக்களில் ஒருவராக கருதிய மாமனிதர்கள் வாழ்ந்த காலம்அது.