மக்கள் வரிப்பணத்தில் நமக்கு விளம்பரமா?

காமராஜ் தலைமையிலான அரசு, பொதுமக்கள் நலனுக்காக பல்வேறு திட்டங்களைச் செயல்படுத்தினாலும், எதிர்க்கட்சியாக இருந்த தி.மு.க.,வில், திரையுலகைச் சேர்ந்தவர்கள் ஆதிக்கம் அதிகமாக இருந்ததால், அவர்களது வளர்ச்சி அதிகரித்துக் கொண்டே இருந்தது.




இதை உணர்ந்த கவிஞர் எஸ்.டி.சுந்தரம், முதல்வர் காமராஜிடம் பேசும்போது, "நாட்டு மக்கள் நலனுக்காக எண்ணற்ற திட்டங்களைத் தீட்டி, செயல்படுத்தி வருகிறோம். ஆனால், மக்கள் ஆதரவு, எதிர்க்கட்சிகள் பக்கம் சென்று கொண்டிருக்கிறது. நமது சாதனைகளை மக்கள் கவனத்திற்கு கொண்டு செல்வதில் நாம் பின்தங்கியுள்ளோம்' என்று சொன்னார்.




"அதற்கு என்ன செய்யலாம்' என, காமராஜ் கேட்டிருக்கிறார்.

"திரைப்படங்கள் மிக வலிமையான சாதனம். அதனால், நமது ஆட்சியின் சாதனைகளைத் தொகுத்து, ஒரு செய்திப்படமாக வெளியிட்டால், எல்லாத் தரப்பு மக்களையும் சென்றடையும்' என்று கவிஞர் கூறினார்.

"நாம் மக்களுக்கு செய்யற காரியத்தை, நாமே விளம்பரப்படுத்தணுமா?' என்று கேட்ட காமராஜ், "சரி... அதுக்கு எவ்வளவு செலவாகும்?' எனக் கேட்டார்.




"சுமாரா மூணு லட்ச ரூபாய்' என்று பதில் வந்தது.

"ஏயப்பா...! மக்கள் தந்த வரிப்பணத்தில் மூணு லட்ச ரூபாய் செலவு செஞ்சு நமக்கு விளம்பரம் தேடணுமா? அந்த மூணு லட்ச ரூபாய் இருந்தால், நான் மூணு பள்ளிக்கூடத்தை திறந்திடுவனே! அந்தப் படம் எல்லாம் வேணாம்' என்று சொல்லி அனுப்பி விட்டார் முதல்வர் காமராஜ்.